Milli Müdafiə Universitetinin nümayəndə heyəti NATO-nun Müdafiə Kollecini ziyarət edib

Azərbaycan Milli Müdafiə Universitetinin (MMU) rektoru general-mayor Gündüz Əbdülovun rəhbərlik etdiyi nümayəndə heyəti Roma şəhərində yerləşən NATO-nun Müdafiə Kollecini ziyarət edib.

Nümayəndə heyəti Kollecin komandanı general-polkovnik Maks Nielsen və dekanı Suzanne Nielsen ilə görüşüb.

Görüşdə tərəflər arasında səmərəli fikir mübadiləsi aparılaraq kollecin əsas vəzifəsi və rolu, bununla yanaşı tərəfdaşlarla mövcud əməkdaşlığı barədə ətraflı məlumat verilib. Görüş zamanı təhsil və əməkdaşlığın qlobal təhlükəsizlik üçün əhəmiyyəti xüsusi vurğulanıb.

Görüş zamanı general-mayor Gündüz Əbdülov Azərbaycanın NATO-nun etibarlı və fəal tərəfdaşı olaraq qlobal sülh və təhlükəsizliyə verdiyi töhfələri qeyd edib. Universitetin rektoru vurğulayıb ki, hərbi təhsil sahəsində qurulan əməkdaşlıq qarşılıqlı uyarlılığın artırılmasına, institusional potensialın möhkəmləndirilməsinə və müasir tələblərə cavab verən hərbi liderliyin formalaşdırılmasına mühüm töhfə verir.

Daha sonra nümayəndə heyətinə Kollecin dekanı S.Nielsen tərəfindən qurumun əsas fəaliyyətləri barədə geniş təqdimat keçirilib. Həmçinin, hərbi təhsil sahəsində əməkdaşlıq imkanları müzakirə olunub, tərəfləri maraqlandıran suallar cavablandırılıb.

Sonda Milli Müdafiə Universitetinin nümayəndə heyətinə NATO Müdafiə Kollecinin inzibati binası, infrastruktur imkanları və tədris prosesi ilə yaxından tanışlıq həyata keçirilib.