Gürcüstan Müdafiə Qüvvələrinin komandanı Cəmşid Naxçıvanski adına Hərbi Liseyi ziyarət edib
Gürcüstan Müdafiə Qüvvələrinin komandanı general-leytenant Giorgi Matiaşvili və onu müşayiət edən nümayəndə heyəti ölkəmizə səfər çərçivəsində Milli Müdafiə Universitetinin tabeliyində fəaliyyət göstərən Cəmşid Naxçıvanski adına Hərbi Liseydə olublar.
Qonaqlara Milli Müdafiə Universitetində və Hərbi Liseydə təhsil sistemi, tədris prosesinin təşkili və hərbi kadr hazırlığı istiqamətində görülən işlər barədə məlumat verilib, onları maraqlandıran suallar cavablandırılıb.
Səfər zamanı nümayəndə heyəti Heydər Əliyev Muzeyi ilə tanış olub. Muzeydə qonaqlara Ulu Öndər Heydər Əliyevin hərbi təhsil sisteminin formalaşması və inkişafındakı tarixi xidmətləri barədə məlumat verilib.
Sonda general-leytenant Giorgi Matiaşvili Hərbi Liseyin “Şərəf kitabı”na ürək sözlərini yazaraq göstərilən qonaqpərvərliyə görə minnətdarlığını bildirib.














