Hipersəs sürətli raketlər müasir hərbi texnologiya ilə müqayisədə böyük hərbi-texniki üstünlüklərə malikdir. Hazırda alim və mühəndislər belə raketlərin kosmosa buraxılması və orada onun sürətinin hipersəs sürəti həddinə çatdırılması, sonra isə yer üzünə qaytarılması variantı üzərində çalışırlar. Həmin silahların çox böyük sürəti onlardan səmərəli müdafiənin də süni intellekt üzərində qurulmasını aktuallaşdıracaqdır.

Müasir hərbi texnologiyanın inkişaf istiqamətlərindən birini də lazer və kinetik silahların yaradılması təşkil edir. Bu gün lazer silahlarının əksəriyyəti quru və dəniz platformalarından istifadə üçün hazırlanır. Lazer silahlarının hərbi təyyarələrin görünüşünə və taktikasına da böyük təsir göstərəcəyini ehtimal etmək olar.

Hazırkı dövrdə süni intellektli ordu-dron sürüləri layihələri üzərində böyük işlər görülməkdədir. Yaxın vaxtlarda Türk Silahlı Qüvvələrində eyni anda böyük sayda dronun bir-birilə koordinasiyalı şəkildə əməliyyat tətbiqi layihəsinin qəbul olunacağı gözlənilir. Süni intellekt ilə idarə olunan dron sürülərinin başlıca xüsusiyyətlərindən biri GPS sistemi olmadan uçuş istiqamətini və hədəfləri asanlıqla müəyyən etmək qabiliyyətidir. Bu istiqamətdə inkişaf etdirilən “Çərkəz” layihəsi dron sürülərinin yerləşməsi, müstəqil avtonom naviqasiyası, xüsusi hədəf tanıma, hədəflərin prioritetləndirilməsi, sürü bölgüsü, görüntü əsaslı məsafənin ölçülməsi, missiyanın planlaşdırılması kimi qabiliyyətlərə malikdir.

Biologiyanın inkişafı və nanotexnologiya yeni kamuflyaj materialların, boyaların və stimulyatorların inkişafına təkan verə bilər. İndi işlənməkdə olan layihələrə görə əsgərin bədəninin müxtəlif hissələrinə, o cümlədən əvvəlcədən beyninə quraşdırılmış implantlar, antidotlar, şok əleyhinə dərmanlar daxil etməklə, xəsarət aldıqda böyük qan itkisinə yol vermədən orqanizmin dərhal əks-reaksiya göstərməsinə və kənardan müdaxilə etmədən həyatının xilas edilməsinə imkan verəcəkdir.