Cəmşid Naxçıvanski adına Hərbi Liseydə xalq artisti Rasim Balayevlə görüş keçirilib
Azərbaycanın görkəmli kino aktyoru, xalq artisti, Dövlət mükafatı laureatı, Prezident təqaüdçüsü, Azərbaycan Kinematoqrafçılar İttifaqının sədri Rasim Balayevin Cəmşid Naxçıvanski adına Hərbi Liseyin kursantları ilə görüşü keçirilib.
Tədbir Azərbaycan xalqının Ümummilli Lideri Heydər Əliyevin və Vətən uğrunda canını fəda etmiş şəhidlərimizin əziz xatirəsinin bir dəqiqəlik sükutla yad olunması ilə başlanıb.
Azərbaycan Respublikasının Dövlət Himni canlı ifa olunub.
Liseyin rəisi, Vətən müharibəsi Qəhrəmanı polkovnik Anar Mirzəyev çıxış edərək görüşün əhəmiyyətindən danışıb, Rasim Balayevin Azərbaycan mədəniyyətində və gənclərin vətənpərvər ruhda formalaşmasında oynadığı mühüm rolu vurğulayıb.
Rasim Balayev kursantlar və zabit-müəllim heyəti ilə səmimi və maraqlı söhbət aparıb. O, Azərbaycan kinosu, milli obrazlar, qəhrəmanlığı və vətənpərvərliyi təbliğ edən filmlərin əhəmiyyətindən danışıb, auditoriyanın istəyilə böyük Azərbaycan mütəfəkkiri İmadəddin Nəsiminin “Neylərəm” qəzəlini səsləndirib.
Görüş zamanı xalq artistinin həyat və yaradıcılığını əks etdirən videoçarx nümayiş etdirilib.
Tədbirin sonunda Rasim Balayevə gül buketi və liseyin xatirə plaketı təqdim olunub, iştirakçılarla xatirə şəkli çəkdirilib.
