Heydər Əliyev adına Hərbi İnstitutda “Qanımızla yaşadaq” adlı qanvermə aksiyası keçirilib

Milli Müdafiə Universitetinin tabeliyində fəaliyyət göstərən Heydər Əliyev adına Hərbi İnstitutda Azərbaycan Qan Donorluğu İnkişaf Mərkəzinin, Respublika Qan Bankının və Milli Müdafiə Universitetinin birgə təşkilatçılığı ilə “Qanımızla yaşadaq” adlı qanvermə aksiyası və eyni adlı konsert tədbirlər həyata kecirilib.

Əvvəlcə xalqımızın Ümummilli Lideri Heydər Əliyevin və Azərbaycan Respublikasının ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.

Tədbirdə çıxış edən Milli Müdafiə Universiteti rektorunun elm üzrə müavini - Hərbi Elmi Tədqiqat İnstitutunun rektoru general-mayor Arif Həsənov Azərbaycan Ordusunun keçdiyi şərəfli yoldan, Hərbi İnstitutu bitirən zabitlərdən söz açıb, keçirilən qanvermə aksiyasının humanitar və mənəvi əhəmiyyətindən bəhs edib.

Azərbaycan Qan Donorluğu İnkişaf Mərkəzinin İdarə Heyətinin sədri Fuad Rəsul çıxışında qan donorluğu mədəniyyətinin təbliği, irsi qan xəstəliyindən əziyyət çəkən şəxslərə göstərilən dövlət qayğısı və bu missiyada hərbi qulluqçuların xüsusi rolunu vurğulayıb. Tədbirin təşkilinə xüsusi diqqət ayıran Milli Müdafiə Universitetinin rəhbərliyinə dərin təşəkkürünü bildirib.

Sonra şəxsi heyət könüllü olaraq qanvermə aksiyasında iştirak edib.

Tədbirin bədii hissəsində incəsənət xadimləri tərəfindən vətənpərvərliyi tərənnüm edən mahnılar ifa edilib və maraqlı kompazisiyalar təqdim olunub.

Sonda xatirə şəkilləri çəkilib.