Naxçıvan Hərbi Kollecinin kursantları sərgini ziyarət edib
Milli Müdafiə Universitetinin tabeliyində fəaliyyət göstərən Naxçıvan Hərbi Kollecinin kursantları “Konstitusiya və Suverenlik İli” münasibətilə təşkil olunan “Füyuzat” jurnalının üz qapaqlarından ibarət sərgini ziyarət ediblər.
Sərgidə kursantlara Azərbaycan mətbuatının inkişafında xüsusi yeri olan “Füyuzat” jurnalının yaranma tarixi, ideoloji istiqamətləri və milli maarifçilik hərəkatındakı rolu barədə geniş məlumat verilib.
Tədbirdə Milli İrsi Mədəni Tarixi Araşdırmalar (MİMTA) Fondunun direktoru və əməkdaşları, həmçinin tarix elmləri doktoru, professor Sevinc Abbasova çıxış edərək jurnalın tədqiqat dəyəri, milli düşüncənin formalaşmasındakı əhəmiyyəti və müasir dövrdə ideoloji baxımdan aktuallığı barədə kursantları məlumatlandırıblar.
Çıxışlar zamanı “Füyuzat” məktəbinin Azərbaycan publisistikasının inkişafına verdiyi töhfələr, milli kimlik, vətənpərvərlik və maarifçilik ideyalarının gənc nəslin dünyagörüşündə yaratdığı təsirlər xüsusi vurğulanıb. Kursantlar sərgidə nümayiş olunan nadir üz qapaqları və arxiv materialları ilə yaxından tanış olaraq jurnalın tarixi irsi haqqında daha dolğun təsəvvür əldə ediblər.
Sonda sərgi nümayəndələri və kursantlar birlikdə xatirə şəkli çəkdiriblər.
