Heydər Əliyev adına Hərbi İnstitutda ingilis dilində intellektual bilik yarışması-viktorina keçirilib
Milli Müdafiə Universitetinin tabeliyində fəaliyyət göstərən Heydər Əliyev adına Hərbi İnstitutda Qələbəmizin 5-ci il dönümü və Dünya Azərbaycanlılarının Həmrəyliyi Gününə həsr olunmuş "Güclü bilik, böyük qələbə" adlı ingilis dilində intellektual viktorina keçirilib.
Hərbi İnstitutun Xarici dillər kafedrasının ingilis dili silsiləsi tərəfindən təşkil edilən viktorinada Hərbi İnstitutun hazırlıq kursunun "Xarıbülbül", 1-ci kursun "Şuşa" və 2-ci kursun isə "Dəmir yumruq" adlı komandaları iştirak ediblər.
Viktorina zamanı iştirakçılar ingilis dilində müxtəlif sahələri əhatə edən açıq tipli sualları cavablandıraraq bilik və bacarıqlarını nümayiş etdiriblər.
Viktorinanın məqsədi kursantların intellektual bilik səviyyələrinin yüksəldilməsi, komandada işləmək bacarıqlarının artırılması, liderlik qabiliyyətlərinin inkişaf etdirilməsi olub.
Gərgin mübarizə şəraitində keçən viktorina münsiflər heyəti tərəfindən yüksək qiymətləndirilib.
Komandalar arasında "Şuşa" komandası daha fəal iştirak edərək viktorinanın qalibi olub.
Sonda qalib komanda və viktorinanın fəalları Hərbi İnstitutun rəhbərliyi tərəfindən kubok, sertifikat və fəxri fərmanla təltif ediliblər.
