"Briqadanın hava hücumundan müdafiəsi üzrə ixtisasartırma kursu"nun buraxılış mərasimi keçirilib

Milli Müdafiə Universitetinin tabeliyində fəaliyyət göstərən Hərbi İdarəetmə İnstitutunda “Briqadanın hava hücumundan müdafiəsi üzrə ixtisasartırma kursu”nun 2-ci buraxılışına həsr olunan mərasim keçirilib.

Tədbirdə əvvəlcə Azərbaycan xalqının Ümummilli Lideri Heydər Əliyevin və Azərbaycan Respublikasının suverenliyi, ərazi bütövlüyü uğrunda şəhid olanların əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Hərbi İdarəetmə İnstitutunun rektoru, milli təhlükəsizlik və hərbi elmlər üzrə fəlsəfə doktoru, polkovnik Elnur Ələsgərli çıxış edərək kursu bitirən zabitləri Müdafiə Nazirliyinin və Milli Müdafiə Universitetinin rəhbərliyinin təbriklərini çatdırıb, “Xidmətboyu təhsil konsepsiyası” çərçivəsində Azərbaycan Ordusununa peşəkar və dövrün tələblərinə uyğun zabit kadrlarının hazırlanmasının əsas prioritet olduğunu qeyd edib. O, kursun hərbi təhsil sistemində aparılan islahatlar nəticəsində reallaşdığını, verilmiş təhsilin müasir müharibələrin aparılma formalarının öyrənilməsi baxımından əhəmiyyət daşıdığını vurğulayıb, kursun təşkili və tədrisdə əməyi keçən zabit və professor-müəllim heyətinə öz təşəkkürünü bildirib.

Məzunlar adında çıxış edən mayor Xəyal Ənvərli tədris dövründə əldə etdikləri bilik və bacarıqlara yiyələnmələri üçün yaradılmış şəraitə və verilən təhsilə görə Milli Müdafiə Universitetinin və Hərbi İdarəetmə İnstitutunun rəhbərliyinə, professor-müəllim heyətinə minnətdarlığını bildirib.

Sonda məzunlara sertifikatlar təqdim olunmuş və xatirə fotosu çəkilib.