Hərbi Liseydə Həzi Aslanovun ildönümü qeyd olunub - Video

Milli Müdafiə Universitetinin tabeliyində fəaliyyət göstərən Cəmşid Naxçıvanski adına Hərbi Liseydə 2 dəfə Sovet İttifaqı Qəhrəmanı, general-mayor Həzi Aslanovun anadan olmasının 116-cı ildönümünə həsr olunmuş tədbir keçirilib.

Tədbirdə əvvəlcə Azərbaycan xalqının Ümummilli Lideri Heydər Əliyevin və Vətənimiz azadlığı uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət himni ifa edilib.

Tədbirdə qəhrəman sərkərdənin şərəfli döyüş yolu, Vətənə sədaqəti və hərbi xidmətdə göstərdiyi misilsiz fədakarlığı xüsusi vurğulanıb, onun zəngin irsinin gənc nəsil üçün əhəmiyyəti diqqətə çatdırılıb.

Anım tədbiri çərçivəsində Ordu İdeoloji və Mədəniyyət Mərkəzinin yaradıcı heyəti tərəfindən vətənpərvərlik ruhunda musiqi nömrələri səsləndirilib, milli rəqslər nümayiş edilib.

Bu cür tədbirlər gənc hərbiçilərdə milli ruhun, Vətənə bağlılığın və qəhrəmanlıq ənənələrinin aşılanmasında mühüm rol oynayır.