Kursantlar Milli İstiqlal Muzeyini ziyarət ediblər

Milli Müdafiə Universitetinin tabeliyində fəaliyyət göstərən Bakı Hərbi Kollecinin kursantları milli-mənəvi dəyərlərimizin və dövlətçilik tariximizin təbliği məqsədilə Milli İstiqlal Muzeyini ziyarət ediblər.

Ziyarət çərçivəsində kursantlar Azərbaycan xalqının azadlıq uğrunda apardığı çoxəsrlik mübarizəni, milli istiqlal ideyasının formalaşma mərhələlərini əks etdirən ekspozisiyalarla yaxından tanış olublar. Muzey əməkdaşları tərəfindən təqdim olunan ətraflı məlumatlar kursantlarda vətənpərvərlik ruhunun daha da möhkəmlənməsinə, tarixi yaddaşın dərinləşməsinə xidmət edib.

Eksponatlar sırasında Azərbaycan Xalq Cümhuriyyətinin yaranması, dövlət atributlarının təsisi, istiqlal mübarizəsində xüsusi xidmətləri olan şəxsiyyətlərin fəaliyyəti və müasir müstəqillik dövrünə aparan yol barədə zəngin materiallar nümayiş olunub.

Belə maarifləndirici ziyarətlər kursantların milli ideologiya, dövlətçilik ənənələri və vətənə sədaqət ruhunda formalaşmasında mühüm əhəmiyyət daşıyır.