Naxçıvan Hərbi Kollecində “Praktiki İngilis dili: Peşəkar ünsiyyət bacarıqlarının inkişafı” adlı yeni layihə təqdim olunub
Milli Müdafiə Universitetinin tabeliyində fəaliyyət göstərən Naxçıvan Hərbi Kollecində kursantların ingilis dili üzrə praktik ünsiyyət bacarıqlarının artırılmasına yönəlmiş yeni layihə təqdim edilib. Layihə çərçivəsində kursantlar gündəlik ünsiyyət, xidmət və peşə fəaliyyəti zamanı qarşılaşa biləcəkləri real həyat situasiyalarına uyğun danışıq tapşırıqları yerinə yetirəcəklər.
Layihənin əsas məqsədi kursantların yalnız nəzəri biliklərini artırmaq deyil, eyni zamanda ingilis dilində sərbəst, düzgün və inamlı danışmaq bacarıqlarını inkişaf etdirməkdir. Proqram dialoqlar, rol oyunları, müzakirələr və real situasiyalara əsaslanan məşğələlər vasitəsilə kursantların ünsiyyət bacarıqlarının gücləndirilməsini, gələcəkdə isə beynəlxalq mühitdə daha uğurla fəaliyyət göstərmələrini hədəfləyir.
