Naxçıvan Hərbi Kollecində tədris-metodiki toplantı keçirilib
Milli Müdafiə Universitetinin tabeliyində fəaliyyət göstərən Naxçıvan Hərbi Kollecində pedaqoji heyətin iştirakı ilə tədris-metodiki toplantı keçirilib.
Toplantının əsas məqsədi tədris prosesinin səmərəliliyinin artırılması, müasir pedaqoji yanaşmaların hərbi təhsil mühitinə inteqrasiyası və qiymətləndirmə mexanizmlərinin təkmilləşdirilməsi olub.
Toplantıda çıxış edənlər dərs mühitinin düzgün təşkili, kursantların adaptasiya prosesində pedaqoji dəstəyin rolu, inkişafyönümlü qiymətləndirmə və davamlı əks-əlaqənin əhəmiyyətini vurğulayıb, mövcud çətinliklərin həlli istiqamətində təkliflər irəli sürüblər.
Eyni zamanda, Milli Müdafiə Universitetinin dosent metodisti tərəfindən “Zəka oyunlarının dərslərə inteqrasiyası və layihə əsaslı öyrənmə” mövzusunda onlayn məşğələ keçirilib. İnteraktiv metodların kursantların məntiqi təfəkkürünün inkişafına və analitik düşüncə bacarıqlarının formalaşmasına müsbət təsir göstərdiyi qeyd olunub.
Toplantı pedaqoji heyətin peşəkar inkişafının gücləndirilməsi və metodikanın təkmilləşdirilməsi baxımından mühüm əhəmiyyət kəsb edib.
