“Dilimiz, mədəniyyətimiz, milli kimliyimiz” adlı tədbir keçirilib

Milli Müdafiə Universitetinin tabeliyində fəaliyyət göstərən Naxçıvan Hərbi Kollecində 21 fevral Beynəlxalq Ana Dili Gününə həsr olunmuş “Dilimiz, mədəniyyətimiz, milli kimliyimiz” adlı tədbir keçirilib.

Əvvəlcə Ulu Öndər Heydər Əliyevin və Azərbaycan Respublikasının ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.

Tədbirdə Naxçıvan Hərbi Kollecinin rəisi, polkovnik Yaşar Hüseynov, filologiya elmləri doktoru, professor Sədaqət Həsənova, eləcə də Naxçıvan Muxtar Respublikası Ali Məclisinin deputatı Təhminə Babayeva çıxış edərək Beynəlxalq Ana Dili Gününün əhəmiyyətindən, Azərbaycan dilinin tarixi inkişaf yolundan və milli-mənəvi dəyərlərimizdən olan dilimizin qorunub saxlanılmasından bəhs ediblər.

Daha sonra tədbirin bədii hissəsində kursantların iştirakı ilə Azərbaycan dilinin bu günümüzədək qorunub saxlanılmasında və inkişafında mühüm xidmətləri olmuş şair və yazıçılara həsr edilən bədii kompozisiya və səhnəciklər təqdim olunub.

Sonda qonaqlarla birlikdə xatirə şəkli çəkdirilib.