Hərbi İdarəetmə İnstitutunun Xarici dil mərkəzində növbəti buraxılış mərasimi keçirilib
Milli Müdafiə Universitetinin tabeliyində fəaliyyət göstərən Hərbi İdarəetmə İnstitutunun Xarici dil mərkəzində müxtəlif dillər üzrə intensiv kursların növbəti buraxılış mərasimi keçirilib.
Mərasimdə çıxış edən Hərbi İdarəetmə İnstitutunun rektoru polkovnik Elnur Ələsgərli müasir dövrdə hərbi qulluqçuların karyera inkişafı, habelə ölkəmizin təmsilçiliyi baxımından xarici dil hazırlığının xüsusi əhəmiyyət kəsb etdiyini bildirib. O, Azərbaycan Ordusunun beynəlxalq hərbi əməkdaşlığının mövcud səviyyəsinin xaricdə təhsil üçün geniş imkanlar yaratdığını vurğulayıb. Azərbaycan Respublikasının beynəlxalq nüfuzunun və strateji əhəmiyyətinin mütəmadi şəkildə artdığı bir şəraitdə ölkəmizin layiqincə təmsil edilməsi, həmçinin Azərbaycan Ordusunun qüdrətinin daha dolğun nümayiş olunması üçün hərbi qulluqçuların yüksək səviyyədə xarici dil biliklərinə malik olmalarının vacibliyini qeyd edib.
Məzunlar arasında Azərbaycan Ordusunun hərbi qulluqçuları ilə yanaşı, qardaş Türkiyə Respublikasının hərbi qulluqçuları da yer alıb.
Sonda məzunlara Hərbi İdarəetmə İnstitutunun rəhbərliyi və Türkiyənin Azərbaycan Respublikasındakı Hərbi attaşesi general-mayor Ersin Dinçer tərəfindən sertifikatlar təqdim edilib, xatirə şəkilləri çəkilib.
