Naxçıvan Hərbi Kollecinin bir qrup şəxsi heyəti “Qərbi Azərbaycana Qayıdış” Festival-Konqresində iştirak ediblər
Milli Müdafiə Universitetinin tabeliyində fəaliyyət göstərən Naxçıvan Hərbi Kollecinin zabit, müəllim və kursantlarından ibarət bir qrup şəxsi heyəti Ordubad şəhərində keçirilmiş “Qərbi Azərbaycana Qayıdış” Festival-Konqresində iştirak ediblər.
18–19 iyun 2026-cı il tarixlərində təşkil olunan tədbirdə Naxçıvan Hərbi Kollecinin stendi iştirakçıların böyük marağına səbəb olub. Stenddə kollecin müəllimi tərəfindən hazırlanmış silah nümunələri, kursantların ərsəyə gətirdikləri rəsm əsərləri və müxtəlif əl işləri nümayiş etdirilib, kursantların təqdimatında tədbirin mövzusuna aid bədii kompozisiya təqdim edilib.
Festival çərçivəsində Naxçıvan Dövlət Universitetində keçirilən elmi konqresdə Naxçıvan Hərbi Kollecinin rəisi və müəllimləri elmi məruzələrlə çıxış ediblər. Təqdim olunan məruzələr yüksək qiymətləndirilib, çıxış edənlərə sertifikatlar təqdim olunub.
Festivalda iştirak Qərbi Azərbaycanın tarixi-mədəni irsinin təbliği, gənc nəslin vətənpərvərlik ruhunda tərbiyəsi və elmi-mədəni əməkdaşlığın inkişafı baxımından mühüm əhəmiyyət kəsb edib.
