İtaliya Respublikası Silahlı Qüvvələrinin kursantları Milli Müdafiə Universitetinin Heydər Əliyev adına Hərbi İnstitutunda olublar
“Azərbaycan Respublikası Müdafiə Nazirliyi ilə İtaliya Respublikası Silahlı Qüvvələrinin Baş Qərargahı arasında 2024-2025-ci illər üçün imzalanmış ikitərəfli hərbi əməkdaşlıq Planı”na əsasən, təşkil olunan “Hərbi Akademiyalar arasında kursant mübadiləsi tədbiri”nin səfər proqramı çərçivəsində adıçəkilən ölkənin kursantları Milli Müdafiə Universitetinin Heydər Əliyev adına Hərbi İnstitutunda olublar.
İtaliyanın Azərbaycandakı hərbi attaşesi 1-ci dərəcəli kapitan Cianfranko Vizzininin də iştirak etdiyi görüşdə əvvəlcə Heydər Əliyev adına Hərbi İnstitutun rektoru polkovnik Ümüdvar Quliyev qonaqları qəbul edərək, onları institutda görməkdən məmnunluğunu ifadə edib. Günün fəaliyyətlər planı ilə bağlı qonaqlar məlumatlandırıldıqdan sonra, akt zalında hərbi institutun tarixi, təhsil mexanizmi, qarşıda duran məqsədləri və digər zəruri mövzuları əhatə edən brifinq nümayiş olunub. Brifinqin sonunda iştirakçı qonaqları maraqlandıran suallar cavablandırılıb.
Brifinq başa çatdıqdan sonra italiyalı kursantlar tədris korpuslarında keçirilən dərs prosesi ilə tanış olublar. Onlara dərs prosesinin təşkili mexanizmləri barədə məlumatlar verilib.
Kursantlar Heydər Əliyev adına Hərbi İnstitutda nahar ediblər.
Sonda xatirə fotosu çəkdirilib.
