Naxçıvan Hərbi Kollecində Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib
Milli Müdafiə Universitetinin tabeliyində fəaliyyət göstərən Naxçıvan Hərbi Kollecində 10 May - Ümummilli Lider Heydər Əliyevin anadan olmasının 103-cü ildönümünə həsr olunmuş “Heydər Əliyev irsi: Dünənimiz, bu günümüz və sabahımız!” adlı tədbir keçirilib.
Əvvəlcə Ümummilli Liderin və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.
Naxçıvan Hərbi Kollecinin rəisi tədbirdə çıxış edərək Ümummilli Lider Heydər Əliyevin dövlətçilik ənənələrinin möhkəmləndirilməsi, milli ordunun formalaşdırılması və ölkənin inkişafı istiqamətindəki xidmətlərindən bəhs edib.
Tədbirin bədii hissəsində Azərbaycan Respublikasının xalq artistləri Samir Cəfərov, Gülyaz Məmmədova, əməkdar artist Nuriyyə Hüseynova və hərbi vətənpərvərlik mahnılarının ifaçısı Şəmistan Əlizamanlı musiqi nömrələri ilə çıxış ediblər.
Sonda fəal iştirak edən qonaqlara təşəkkürnamələr təqdim olunub, xatirə şəkli çəkdirilib.
