”Zabit ixtisas kursu”nun buraxılış mərasimi keçirilib
Azərbaycan Ordusunun Təlim və Tədris Mərkəzində təşkil olunmuş “Zabit ixtisas kursu”nun buraxılış mərasimi keçirilib.
Kurs müddətində gənc leytenantlar 11 ixtisas sahəsində nəzəri və praktiki biliklərə yiyələniblər.
Tədbirdə əvvəlcə xalqımızın Ümummilli Lideri Heydər Əliyevin və Vətənimizin ərazi bütövlüyü, suverenliyi və müstəqilliyi uğrunda gedən döyüşlərdə şəhid olanların xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.
Giriş sözü ilə tədbiri açan Milli Müdafiə Universitetinin rektoru general-mayor Gündüz Əbdülov əlamətdar gün münasibəti ilə gənc leytenantları Müdafiə Nazirliyinin rəhbərliyi və öz adından təbrik edib. General-mayor G.Əbdülov çıxışında dünyanın qabaqcıl ölkələrinin təcrübələri əsasında hərbi təhsil sahəsində aparılan əhatəli islahatlar barədə məlumat verib, görülmüş fəaliyyətlər nəticəsində hərbi qulluqçuların karyera inkişafında mühüm rol oynayacaq yeni təhsil imkanlarının yaradıldığını vurğulayıb. O, kursun məzunlarının xidmət edəcəkləri bölmələrin döyüş və mənəvi-psixoloji hazırlığının yüksəldilməsində mühüm rol oynayacağına əmin olduğunu bildirib, gənc zabitlərə tövsiyələrini çatdırıb, yeni xidmət yerlərində uğurlar arzulayıb.
Daha sonra kurs birincisi leytenant Rasim Kərimov tərəfindən “yaş kötüyü”nə kursun simvolu həkk edilib. Məzunlar adından çıxış edən kurs birincisi yaradılan şəraitə, eləcə də kursun yüksək səviyyədə təşkilinə görə rəhbərliyə və müəllim heyətinə minnətdarlıqlarını bildirib.
Sonda kursu müvəffəqiyyətlə bitirən gənc zabitlərə sertifikatlar, fəxri fərmanlar və qiymətli hədiyyələr təqdim edilib.
